Advertisment

Partiyalar bələdiyyələrdə: yerli özünüidarəetmədə fəallıq necədir?

Azərbaycanda yerli özünüidarəetmə institutunun formalaşmasında mühüm mərhələ 1999-cu ildə keçirilən ilk bələdiyyə seçkiləri ilə başlayıb. Ötən illər ərzində bələdiyyələr ölkənin yerli idarəetmə sisteminin bir hissəsinə çevrilib.

Hazırda müxtəlif siyasi partiyaların nümayəndələri də bələdiyyələrdə təmsil olunur və yerli məsələlərin həllində iştirak edirlər. Bəs bu gün bələdiyyələrdə təmsil olunan siyasi partiya nümayəndələri yerli özünüidarəetmədə hansı rolu oynayırlar? Onlar seçildikləri ərazilərin sosial, iqtisadi və digər yerli problemlərinin həllinə real şəkildə təsir göstərə bilirlərmi? Müxtəlif siyasi baxışları təmsil edən şəxslərin bələdiyyələrdə təmsil olunması yerli idarəetməyə hansı yeni yanaşmaları gətirir? 

ReAl Partiyasının sədri Natiq Cəfərli partiyadan 5 nəfərin bələdiyyə üzvü kimi fəaliyyət göstərdiyini deyib. 

Herbiand.az-ın sorğusuna cavab olaraq Milli Cəbhə Partiyasının sədr müavini Ehtiram Mehdiyev isə partiyanın 3 nümayəndəsinin bələdiyyələrdə təmsil olunduğunu deyib.

Ümid Partiyası da bələdiyyələrdə təmsil olunur. Partiyanın İdarə Heyətinin üzvü Tamilla Qulami deyib ki, təmsil etdiyi siyasi təşkilatın 17 üzvü bələdiyyələrə seçilib. 

Partiya nümayəndələri bildirirlər ki, onların bələdiyyə üzvləri yerli idarəetmədə aktiv iştirak edir, seçicilərlə görüşür və ərazilərdəki problemlərin gündəmə gətirilməsinə çalışırlar. Bələdiyyə üzvlərinin fəaliyyət istiqamətlərindən biri də yerli iqtisadi inkişaf, sosial məsələlər, ekologiya, büdcə və digər sahələr üzrə daimi komissiyaların işində iştirak etməkdir.

Qeyd edək ki, Ümid Partiyasının təmsilçisi Tamilla Qulami Binəqədi bələdiyyəsində “Yerli iqtisadi inkişaf məsələləri daimi komissiyası”nın sədridir. Binəqədi bələdiyyəsinin rəsmi məlumatına əsasən, həmin komissiyada yerli iqtisadi inkişaf məsələləri ilə bağlı fəaliyyətin təşkili və müvafiq məsələlərin müzakirəsi həyata keçirilir. 

Bu komissiyalar bələdiyyənin yerli əhəmiyyətli məsələlər üzrə qərarlarının hazırlanmasında və müzakirəsində mühüm rol oynayır. Yerli iqtisadi inkişaf istiqamətində isə ərazinin iqtisadi potensialının öyrənilməsi, sahibkarlığın və yerli təşəbbüslərin dəstəklənməsi, bələdiyyənin maliyyə imkanlarının səmərəli istifadəsi kimi məsələlər gündəmə gələ bilər. 

Partiya nümayəndələrinin sözlərinə görə, bələdiyyələrdə təmsil olunan üzvlərin əsas məqsədlərindən biri seçildikləri ərazilərdə sakinlərlə daha sıx əlaqə qurmaq və yerli problemlərin həllinə töhfə verməkdir. Yerli özünüidarəetmənin səmərəliliyi isə yalnız seçilən şəxslərin sayından deyil, onların bələdiyyə fəaliyyətində nə dərəcədə fəal iştirak etməsindən də asılıdır. Bu mənada müxtəlif siyasi baxışları təmsil edən şəxslərin bələdiyyələrdə iştirakı yerli məsələlərin müzakirəsinə fərqli yanaşmaların gətirilməsi baxımından diqqət çəkir.

Bələdiyyələrin qarşısında duran əsas məsələlərdən biri isə sakinlərin gündəlik problemlərinə daha operativ reaksiya vermək və mövcud resurslardan səmərəli istifadə etməkdir. Bələdiyyə üzvlərinin yerli idarəetmədə fəallığı artdıqca vətəndaşlarla əlaqələrin də daha sistemli qurulması gözlənilir. Nəticə etibarilə, 27 ildir fəaliyyət göstərən bələdiyyə institutu qarşısında duran əsas vəzifələrdən biri yerli səviyyədə idarəetmənin və vətəndaş iştirakının daha da gücləndirilməsidir.

 

Məhəmməd Əliyev

Herbiand.az